ПАСКАЛЬ ГОДЕФРУА, ФРАНСУА ЭСКУИ НАРТ “НАЙРАМДАЛ” МЕДАЛЬ ГАРДУУЛАВ

ПАСКАЛЬ ГОДЕФРУА, ФРАНСУА ЭСКУИ НАРТ “НАЙРАМДАЛ” МЕДАЛЬ ГАРДУУЛАВ

27

2017.10.17

Монгол Улсын Ерөнхийлөгчийн Зарлигаар Бельгийн Вангийн байгалийн шинжлэх ухааны хүрээлэнгийн үйл ажиллагааны асуудал хариуцсан захирал Паскаль Годэфруа, Францын “Eldonia” компанийн захирал Франсуа Эскуи нарыг “Найрамдал” медалиар шагнасныг Элчин сайд О.Оч гардуулан өгөв.

Паскаль Годефруа, Франсуа Эскуи нар нь Монголоос гаралтай, хууль бусаар хил давуулан худалдаалагдсан үлэг гүрвэлийн олдворыг эх оронд нь буцаах чиглэлээр 2011 оноос хойш тууштай ажиллаж буй бөгөөд энэ хүрээнд хэд хэдэн олдворыг эх оронд нь буцаагаад байгаа билээ. Тухайлбал, Өмнөговь аймгийн Бүгийн цав хэмээх хавцлаас олдсон палеонтологийн нэн ховор олдвор болох Дейнохейрус хэмээх үлэг гүрвэлийн гавлын болон хойт хөлний 2 тавхайны ясыг 2014 оны 5 дугаар сарын 1-ний өдөр ШУА-ын Палеонтологийн төвд хүлээлгэн өгсөн юм. Мөн Монголын Говьд “Луугийн булш” гэдэг газраас олдсон Зауролофус ангустирострис буюу нугасан хошуут үлэг гүрвэлийн үр хөврөлийг 2016 оны 4 дүгээр сард Монгол руу буцааж, БСШУЯ-нд хүлээлгэн өгсөн юм.

Түүнчлэн 2015 онд “Соёлын өвийн салбарт хамтран ажиллах тухай Монгол Улсын Боловсрол, соёл, шинжлэх ухааны яам, Бельгийн шинжлэх ухааны бодлогын газар болон Вангийн байгалийн шинжлэх ухааны хүрээлэн хоорондын хэлэлцээр” байгуулсан бөгөөд энэхүү хэлэлцээрийн дагуу хэд хэдэн олдворыг эх оронд нь буцаахаар Монгол, Бельгийн палеонтологичид хамтран ажиллаж байна. Ерөнхийдөө шинэ төрлийн үлэг гүрвэлийн олдворууд илэрч байгаа. Эдгээр олдворуудыг олж тогтоож, хамтарсан судалгаа хийхийг талууд чухалчилж байна.